موبائل فون پر کسی قریبی عزیز کی گرفتاری کے نام پر لاکھوں روپے لوٹنے والے جعلی پولیس اہلکاروں کو گرفتار کرلیا گیا۔
واضح رہے کہ گزشتہ کئی روز سے کئی لوگوں کے ساتھ یہ مسئلہ پیش آچکا ہے کہ انہیں ایک موبائل نمبر سے کسی کی کال موصول ہوتی ہے اور سامنے سے بولنے والا بتاتا ہے کہ آپ کا بھتیجہ یا بھانجہ اپنے دوستوں کے ساتھ ایک لڑکی کے ہمراہ پکڑا گیا ہے، جس کی گرفتاری ہم ظاہر کررہے ہیں۔
اس کال کا دائرہ کار عام نہیں بلکہ خاص لوگوں اور نامور صحافی فہیم صدیقی تک بھی پہنچا تاہم وہ پہلے سے واقعے کا علم ہونے کی وجہ سے خاموش رہے۔ حیران کن بات یہ ہے کہ معاملات رپورٹ ہونے کے باوجود ایسے عناصر کے خلاف کوئی کارروائی عمل میں نہیں آرہی تھی۔
اب ایف آئی اے سائبر کرائم نے فیصل آباد میں کارروائی کرتے ہوئے جعلی پولیس اہلکار بن کر لوٹنے والا گروہ گرفتار سائبر کرائم سرکل فیصل آباد نے کارروائی میں 2 ملزمان کو گرفتار کر لیا، گرفتار ملزمان میں محمد محسن اور محمد یونس شامل ہیں ملزمان خود کو پولیس اہلکار ظاہر کرتے ہوئے عام شہریوں کو کال کرتے تھے۔
ملزمان قریبی رشتےدار کی جعلی گرفتاری کی اطلاع دیتے ہوئے ڈراتے تھے اور رہائی کے لئے رقم کا تقاضہ کرتے تھے ملزمان جعل سازی کرتے ہوئے 25 لاکھ 70 ہزار روپے کا فراڈ کر چکے تھے۔
