لاہور: حکومت کی جانب سے ارکان قومی اسمبلی کے استعفوں کی منظوری کا جواب دینے کیلئے چیئرمین پاکستان تحریک انصاف عمران خان نے حکمت عملی تیار کر لی۔
عمران خان نے قومی اسمبلی سے استعفوں کی منظوری کے بعد انتخابی مہم تیز کرنے کا فیصلہ کرتے ہوئے کہا ہے ڈاکٹروں سے اجازت ملنے کے بعدحکومت کو ٹف ٹائم دینے کیلئے میدان میں اتروں گا،انہوں نے جلسوں کا شیڈول تیار کرنے کی ہدایت کر دی۔ذرائع کے مطابق انتخابی مہم میں رجیم چینج کے ساتھ مہنگائی کوایشو بنایا جائے گا جبکہ ملک کو بدترین معاشی مشکلات سے نکالنے کیلئے عمران خان قوم کو روڈ میپ بھی دیں گے، معاشی ٹیم کو معاشی بحران سے نکلنے کیلئے تجاویز تیار کرنے، سوشل میڈیا ٹیم کو حکومت کی ناکام معاشی پالیسیوں اور مہنگائی کو ایشو بنانے کی ہدایت کر دی ۔
عمران خان نے سپیکر قومی اسمبلی کی جانب سے 70 ارکان کے استعفے منظورکرنےکے بعد اسد قیصر کی قیادت میں دیگر رہنمائوں کو باقی استعفوں کی منظوری کیلئے بھی ٹاسک دے دیا، عمران خان نے کہا انتخابات سے پہلے تحریک انصاف کا پیغام گھر گھر پہنچنا چاہئے ،’’الیکشن کرا ئوملک بچا ئو‘‘اور ڈور ٹو ڈور مہم میں مزید تیزی لائی جائے۔
عمران خان سے سابق وزیر خزانہ شوکت ترین نے زمان پارک میں ان کی رہائشگاہ پر ملاقات کی جس میں معاشی صورتحال پر تبادلہ خیال کیا گیا ۔ شوکت ترین نے کہا معیشت سےجڑے تمام اشارے منفی رجحان کی جانب گامزن ہیں ، ہر گزرتا دن ملک کو مزید مشکلات کی دلدل میں دھکیل رہا ہے ۔ عمران خان نے ہدایت کی کہ موجودہ حکومت کی ناکام معاشی پالیسیوں کو عوام کے سامنے لایا جائے ، عوام کو بتایا جائے کہ رجیم چینج آپریشن کے بعد ملک کن مشکلات سے دوچار ہوا ۔
