کراچی: وزیراعلیٰ سندھ سید مراد علی شاہ سے امریکا کے سفیر ڈونلڈ بلو م نے وزیراعلی ہاؤس میں ملاقات کی ،کراچی میں امریکن قونصل جنرل نیکول تھریوٹ بھی ملاقات میں موجود تھے۔
وزیراعلیٰ سندھ کے ساتھ چیف سیکریٹری سہیل راجپوت ، اسپیشل اسسٹنٹ قاسم نوید ، چیئرمین پی اینڈ ڈی حسن نقوی اوروزیراعلیٰ سندھ کے سیکریٹری رحیم شیخ شریک تھے۔ملاقات میں سیلاب متاثرین کی بحالی کے پراجیکٹ کے حوالے سے بات چیت کی گئی اورسیلاب متاثرین کی بحالی کے لیے جاری امدادی سرگرمیوں کا جائزہ لیا گیا۔
ملاقات میں پاکستان کے ساتھ تجارتی تعلقات کوفروغ دینے پربھی بات چیت کی گئی۔امریکی قونصل جنرل نیکول تھریوٹ کا کہنا تھا کہ امریکا سندھ کے سیلاب متاثرین کی بحالی میں حکومت سندھ کی بھرپور مدد کرے گا اوراس پر امریکا ایک ایونٹ کرانا چاہتاہے۔
وزیراعلی سندھ سید مراد علی شاہ نے مہمانوں کوبتایا کہ سیلاب متاثرین کے گھروں کی تعمیر کے حوالے سے فنڈز کا اجرا شروع ہوگیا ہےحکومت سندھ زراعت کی بحالی کے لیے بھی کاشت کاروں کی مدد کررہی ہے اورسیلاب متاثرین کی مکمل بحالی تک اقدامات جاری رہیں گے۔