کراچی: امیر جماعت اسلامی سراج الحق نے کہا ہے کہ ملک کو آئی ایم ایف کے قرضوں کی ضرورت نہیں، وزرا اور مشیروں کی فوج ظفر موج کم کی جائے، حکمران غیر ترقیاتی اخراجات، کرپشن اور سودی معیشت کا خاتمہ کریں،پاکستانیو اپنی جیبوں کی حفاظت کرو، حکمرانوں نے ڈاکہ ڈالنے کی کوشش کی تو جماعت اسلامی آپ کے ساتھ مل کر ان کو گریبانوں سے پکڑے گی، تین روزہ مہنگائی مارچ کے دوران حکومت پر واضح کر دیا کہ 170ارب کے نئے ٹیکسز اور منی بجٹ قبول نہیں کریں گے، آئی ایم ایف کے قرضے غریب عوام نے نہیں حکمرانوں نے کھائے ہیں، وہی ادا کریں، اپنی جائدادیں اوراثاثے بیچیں اور باہر کے بنکوں میں پڑی لوٹی ہوئی دولت واپس لائیں۔
ان خیالات کا اظہار انہوں نے جامعہ منصورہ ہالہ سندھ میں تقریب تکمیل بخاری شریف سے خطاب کرتے ہوئے کیا۔ نائب امرا اسد اللہ بھٹو، ڈاکٹر معراج الہدیٰ صدیقی، امیرصوبہ سندھ محمد حسین محنتی، امیر ضلع مولانا ایاز اصلاحی اورمدیر جامعہ منصورہ مولانا احسن بھٹو بھی اس موقع پر موجود تھے۔
امیر جماعت نے کہا کہ ملک پر مسلط حکمران استعمار اور سامراج کے ایجنٹ ہیں،ایسٹ انڈیا کمپنی اور امریکا کے نسل در نسل غلاموں نے ایٹمی پاکستان کو پوری دنیا میں مذاق بنا دیا، غیور پاکستانیوں کو بھکاری بنا کر پیش کیا جا رہا ہے۔ پی ڈی ایم، پیپلزپارٹی اور پی ٹی آئی کی پالیسیوں میں یکسانیت ہے، کرپٹ ٹرائیکا نے معیشت تباہ کی، اداروں کو کمزور کیا، آج مہنگائی کی وجہ سے کراچی سے چترال تک ہر شخص پریشان ہے۔ ملک میں انصاف نہیں، پٹوار اور پولیس کا ظلم ہے، ظالموں نے غریبوں سے ایک وقت کا کھانا بھی چھین لیا ہے۔ حکمرانوں کی نااہلی کی وجہ سے ملک 62ہزار ارب کا مقروض ہے، وسائل سے مالامال پاکستان میں کسان، مزدور، سرکاری ملازم، کاروباری طبقہ سب رو رہے ہیں۔
انہوں نے کہاکہ پیپلزپارٹی سندھ میں 15برسوں سے حکومت میں ہے، اس نے صوبہ کے عوام کو غربت اور بے روزگاری کے علاوہ کیا دیا؟ پی ٹی آئی نے دس سال میں خیبرپختونخوا کو تباہ کیا، ن لیگ دہائیوں سے اقتدار میں ہے، اپنی کارکردگی بتائے۔ اگر پی ٹی آئی نے قوم کے پونے چار سال ضائع کیے تو 14جماعتوں پر مشتمل پی ڈی ایم اور پیپلزپارٹی کی حکومت نے دس ماہ میں رہی سہی کسر نکال دی، یہ لوگ پہلے مہنگائی کے خلاف ریلیاں اور لانگ مارچز کرتے تھے، آج خود مہنگائی کے کوڑے عوام پر برسا رہے ہیں۔
قبل ازیں نوری آباد اور ہالا میں استقبالی اجتماع اور میڈیا سے بات چیت کرتے ہوئے سراج الحق کا کہنا تھاکہ پی ڈی ایم، پی ٹی آئی اور پی پی کی ٹرائکا نے پورے ملک کو یرغمال بنا رکھا ہے، کراچی کے لوگوں نے جماعت اسلامی پر اعتماد کیا ہے مگر پیپلزپارٹی تسلیم کرنے کے لیے تیار نہیں ہے۔ کراچی کا میئر وہی ہوگا جس کو عوام منتخب کریں گے۔ پیپلزپارٹی ہمیشہ دھونس دھاندلی سے اقتدار میں آتی ہے۔
