پیپلز پارٹی جتنی کوشش کرلے میئر کراچی جماعت اسلامی کا ہی ہو گا: حافظ نعیم

کراچی : امیر جماعت اسلامی کراچی حافظ نعیم الرحمنٰ نے کہا کہ کراچی کی آبادی کو کم کرنے پر پیپلز پارٹی بھی کچھ نہیں کہتی ۔
کراچی کے عوام کی حقیقی آبادی قانونی طور پر شمار ہوگئی تو اس کے اقتدار کو بھی خطرہ لاحق ہو جائے گا اور سندھ کا وزیر اعلیٰ کراچی سے بھی آسکتا ہے۔
سندھ حکومت اور پیپلز پارٹی کچھ بھی کر لے مئیر ہمارا ہی ہو گا۔
ان خیالات کا اظہار انہوں نے جماعت اسلامی کراچی شعبہ نشرو اشاعت کے تحت ادارہ نور حق میں صحافیوں کے اعزاز میں دعوت افطار سے خطاب کرتے ہوئے کیا۔
حافظ نعیم الرحمنٰ نے مزید کہا کہ ہماری درست تعداد شمار نہ ہونے کی وجہ سے ہی وسائل میں حصہ اور ملازمتوں میں کوٹہ کم ملتا ہے اور سندھ میں دیہی و شہری تقسیم کی بنیاد پر بھی الگ سے کوٹہ سسٹم لاگو ہو تا ہے اگر آبادی کا درست شمار ہو جائے تو سندھ میں ایک توازن قائم ہوجائے گا۔