قومی احتساب بیورو کے کراچی آفس نے محکمہ خوراک میں اربوں روپے کی کرپشن پر سندھ فوڈ ڈپارٹمنٹ کے ڈائریکٹر،ڈپٹی ڈائریکٹرکراچی اور حیدرآباد ڈویژن کو کال اپ نوٹسزجاری کردیے
ذرائع کے مطابق ملیر،حیدرآباد،دادو،جامشورو میں 2021 سے تعینات ضلعی فوڈ کنٹرولرزکے سروس پروفائل فراہمی کی ہدایت کی گئی ہے جبکہ ڈائریکٹر فوڈ کو 2021-22 میں خراب گندم کی فصل سے متعلقہ رپورٹ اور اس ض٘ن میں کی گئی خط و کتابت بھِی طلب کرلی گئی ہے۔
کراچی اور حیدرآباد ڈویژن کے ڈپٹی ڈائریکٹرز فوڈز کو ریکارڈ کی فراہمی کے لیے پروفارما جاری کردیا گیا ہے، پروفرما کے ذریعے ماتحت ضلعی فوڈ کنٹرولرز کی حدود میں قائم فلورملز،آٹا چکیوں کو جاری گندم کی بوریوں کی تفصیلات فراہمی کی ہدایت کی گئی ہے۔
فلورملز،آٹاچکیوں کے بجلی بلز میں درج استعمال شدہ بجلی یونٹس تفصیلات کی فراہمی کی ہدایات بھی کی گئی ہیں جبکہ نیب نوٹسز میں طلب کردہ تفصیلات کے ساتھ تمام ضلعی فوڈ کنٹرولرزکو نیب جوائنٹ ٹیم کے روبرو پیش ہونے کی ہدایت کی گئی ہے۔
نیب کی جانب سے ڈائریکٹر سندھ فوڈ ڈیپارٹمنٹ سے ریکارڈ اور تفصیلات پہلے بھی طلب کی گئی تھیں،نیب کو محکمہ خوراک میں مبینہ طور پر کئی ارب کی کرپشن کے شواہد مل چکے ہیں،کرپشن تحقیقات کے مطابق ایک سابق صوبائی وزیرکے فرنٹ مین کے بینک اکاؤنٹس استعمال ہوتے رہے۔
