پیپلزپارٹی کراچی کا کے الیکٹرک کے خلاف بھرپور احتجاج کا عندیہ

پاکستان پیپلزپارٹی نے کے الیکٹرک کی جانب سے لوڈشیڈنگ کے خلاف احتجاج کا عندیہ دے دیا۔

پاکستان پیپلز پارٹی کراچی کے صدر و سابق صوبائی وزیر سعید غنی نے کہا ہے کہ ’’کے الیکٹرک‘‘ نے کراچی کے شہریوں کو ذہنی مریض بنا دیا ہے، کے الیکٹرک فوری طور شہریوں سے زیادتی بند کرے۔

انہوں نے کہا کہ پیپلز پارٹی کے تحت جلد ’’کے الیکٹرک‘‘ کے خلاف بھرپور احتجاج کیا جائے گا۔ اپنے جاری ایک بیان میں سعید غنی نے کہا کہ ’’کے الیکٹرک‘‘ نے کراچی میں ’’اجتماعی سزا‘‘ کا غیر انسانی نظام رائج کیا ہوا ہے۔

انہوں نے کہا کہ کے الیکٹرک نے کراچی کے کئی علاقوں میں 14 گھنٹے سے زائد کی لوڈ شیڈنگ شروع کر رکھی ہے، جس کے باعث کراچی کے شہری ذہنی مریض بن گئے ہیں۔

سعید غنی نے کہا کہ کراچی میں طویل لوڈ شیڈنگ سے بچوں کی تعلیم بری طرح متاثر ہورہی ہے۔ ظالمانہ لوڈ شیڈنگ سے بزرگ اور بیمار شہری اذیت میں مبتلا ہیں ۔

انہوں نے کہا کہ کے الیکٹرک کی وجہ سے شہر کے کئی علاقوں میں پانی کی فراہمی متاثر ہورہی ہے۔ اگر کے الیکٹرک نے اپنی روش نہ بدلی اور لوڈشیڈنگ کا خاتمہ نہ کیا تو جلد بھرپور احتجاج کیا جائے گا۔

انہوں نے کہا کہ کے الیکٹرک پر امن احتجاج کرنے والے شہریوں پر مقدمات درج کروا رہی ہے لیکن ہم اب مجبور ہیں کہ ان کے خلاف مقدمات کا اندراج کرائیں۔

سعید غنی نے کہا کہ ’’کے الیکٹرک‘‘ فوری طور شہریوں سے زیادتی بند کرے اور نگراں وزیر اعلیٰ سندھ “کے الیکٹرک” کی غنڈہ گردی کا فوری نوٹس لیں۔

اپنا تبصرہ بھیجیں: