سندھ پولیس نے صحافی نصر اللہ کے قتل میں ملوث مرکزی ملزم کو گرفتار کرلیا۔
تفصیلات کے مطابق گھوٹکی میں تھانہ میرپور ماتھیلو کی حدود میں کارروائی کرتے ہوئے شہید صحافی نصر اللہ کے قتل میں ملوث مرکزی ملزم کو گرفتار کرلیا۔ ایس ایس پی سمیر نور کے مطابق ملزم کی اصغر ولد ہوت لونڈ کے نام سے ہوئی ہے۔
پولیس کے مطابق گرفتار ملزم کے ساتھی برکت لونڈ کی گرفتاری کے لیئے چھاپے مارے جارہے ہیں جبکہ عبداللہ لونڈ نامی شخص نے ملزمان کی سہولت کاری کی، دونوں ملزمان کو جلد گرفتار کرلیا جائے گا۔
ایس ایس پی نے بتایا کہ ملزمان کی گرفتاری کے لیئے جدید ٹیکنالوجی کی مدد لی گئی، ملزمان سے واقعے میں استعمال ہونے والا پسٹل اور موٹر سائیکل برآمد کی گئی ہے۔ کیس میں گرفتار ہونے والے ملزمان کی تعداد 4 تک پہنچ گئی ہے۔
صوبائی وزیر داخلہ ضیاءالحسن لنجار کی پولیس کو شاباش دیتے ہوئے ایس ایس پی گھوٹکی اور پوری ٹیم کو خراج تحسین پیش کیا۔ انہوں نے تصدیق کی کہ پولیس نے میرپور ماتھیلو سے مرکزی ملزم کو گرفتار کیا ہے، وزیر داخلہ ضیاءالحسن لنجار نے چند روز قبل سینئر صحافیوں کی ٹیم کو نصراللہ گڈانی کے قاتلوں کی گرفتاری کی یقین دہانی کروائی تھی۔
انہوں نے بتایا کہ مزید ملزمان کی گرفتاری کے لئے چھاپے مارے جارہے ہیں، پیپلزپارٹی کی سندھ حکومت پولیس کو مزید سہولتیں فراہم کررہی ہے۔ صوبے میں قیام امن ہماری اولین ترجیح ہے۔
