کراچی: آن لائن ٹیکسی سروس نے صارفین کی مشکلات کو مدنظر رکھتے ہوئے شاندار اعلان کردیا، اس اعلان کا لوگوں کو کئی مہینوں سے انتظار تھا۔
کریم کی جانب سے بتایا گیا ہے کہ اب وہ صارفین جن کے پاس انٹرنیٹ کی سہولت میسر نہیں وہ بھی آسانی کے ساتھ گاڑی بک کرسکتے ہیں، یاد رہے کہ لوڈ شیڈنگ، وائی فائی سے کنکشن منقطع ہونے پر بہت سے صارفین کو کریم بلانے میں پریشانی کا سامنا ہوتا تھا۔
سروس استعمال کیسے کی جاسکتی ہے؟
کریم کی جانب سے اس طریقہ کار کو سمجھانے کے لیے پوسٹر جاری کیا گیا، جس میں بتایا گیا ہے کہ اب صرف 25 پیسے میں ایک ٹیکسٹ میسج کر کے آپ اپنی جگہ پر ٹیکسی بلا سکتے ہیں۔
کمپنی کی جانب سے جاری ہونے والے اعلامیے میں بتایا گیا ہے کہ ابتدائی مرحلے میں سروس صرف کراچی کے دس مقامات پر استعمال کی جاسکتی ہے۔ جن میں ایم اے جناح روڈ اماں ٹاور، کینٹ اسٹیشن، حسن اسکوائر سوک سینٹر، شاہین کمپلیکشن، کراچی یونیورسٹی مسکن گیٹ، واٹر پمپ، تین تلوار، نیپا چورنگی، میلینیم مال اور جناح اسپتال شامل ہیں۔
کریم اس بات پر پرعزم ہے کہ جلد سروس کا دائرہ کار بڑھا کر اسے پورے کراچی اور ملک بھر تک وسیع کیا جائے گا۔
نوٹ: ہر لوکیشن کا اپنا کوڈ ہے جو میسج کے وقت استعمال کرنا ہوگا۔ اس حوالے سے کریم اپنے کسٹمرز کو بذریعہ ایس ایم ایس یا ایپ کے ذریعے آگاہ کردے گا۔
یہ بھی سہولت دی گئی ہے کہ اگر کسٹمر چاہیے گا تو بذریعہ ایس ایم ایس رائیڈ کو کینسل کردے گا، ایک بار جس لوکیشن کا کوڈ ڈالا جائے گا کمپنی کی جانب سے کپتان کو وہی بھیجا جائے گا۔
