انگلینڈ کی ٹیم نے 7 ٹی ٹوینٹی میچز کی سیریز کے آخری میچ میں پاکستان کو بدترین شکست سے دوچار کر کے ٹرافی اپنے نام کرلی۔
قومی ٹیم کے کپتان بابر اعظم نے ٹاس جیت کر انگلینڈ کو پہلے دعوت دی اور ہر صورت سیریز اپنے نام کرنے کے عزم کا اظہار کیا تھا۔
انگلینڈ نے مقرر اوورز میں تین وکٹوں کے نقصان پر 209 رنز بنائے۔ انگلش ٹیم نے بیٹنگ شروع کی تو الیکس ہیلز 18 رنز بنا کر ایل بی ڈبلیو اور فل سالٹ 20 رنز بنا کر رن آؤٹ ہوگئے۔ مہمان ٹیم نے تیسری وکٹ کی شراکت میں 62 رنز بنائے لیکن یہاں بین ڈکٹ 30 رنز بنا کر وکٹ کیپر محمد رضوان کے ہاتھوں اسٹمپ آؤٹ ہوگئے۔
چوتھی وکٹ کی شراکت میں 108 رنز بنائے گئے جس میں 52 رنز ڈیوڈ ملان اور 46 رنز ہیری بروک کے شامل ہیں۔
کپتان بابراعظم نے ڈیوڈ ملان کا 30 رنز پر پہلا کیچ چھوڑا کیا جس کے بعد 62 رنز پر محمد وسیم نے ڈیوڈ ملان کا دوسرا کیچ چھوڑ دیا۔ وہ 78 رنز بنا کر ناقابل شکست رہے۔
محمد وسیم جونیئر نے 4 اوورز میں سب سے زیادہ 61 رنز دیے۔
انگلینڈ کے 210 رنز کے ہدف میں پاکستانی ٹیم مقررہ اوورز میں آٹھ کھلاڑیوں کے نقصان پر 142 رنز بنا سکی۔ آل راؤنڈر شاداب خان فیلڈنگ کے دوران ہیمسٹرنگ اسٹرین (انجرڈ) ہوئے جس کے باعث وہ میچ میں بیٹنگ کرنے نہیں آسکے۔
ہدف کے تعاقب میں کپتان بابراعظم 4 رنز، محمد رضوان ایک رن اور افتخار احمد 19 رنز بنا کر پویلین لوٹ گئے۔ چوتھی وکٹ کی شراکت میں 53 رنز بنائے گئے لیکن یہاں خوشدل شاہ 27 رنز بنا کر آؤٹ ہوئے۔
اسکے بعد آصف علی 7 رنز اور محمد نواز 9 رنز بنا کر پویلین لوٹ گئے جبکہ شان مسعود 56 رنز کی اننگز کھیل کر آؤٹ ہوئے۔ محمد وسیم جونیئر 5 رنز بنا کر چلتے بنے۔
یوں انگلینڈ کی ٹیم نے پاکستان کو 67 رنز سے بدترین شکست دی۔
