لاہور:تحریک انصاف کی مقبولیت کم کرنے کے لئے مسلم لیگ(ن) تاحال کامیاب حکمت عملی بنانے میں ناکام ہےجس کے باعث جماعت میں مایوسی پیدا ہورہی ہےجبکہ سینئر سیاستدانوں کو نظرانداز کرکے مریم نواز کو چیف آرگنائزر بنانے سے بھی مسلم لیگ(ن) میں مسائل بڑھنے لگے۔
ذرائع کا کہنا ہے کہ مسلم لیگ(ن) کی قیادت کی کوشش ہے کہ ایسی حکمت عملی بنائی جائے جس سے تحریک انصاف کی مقبولیت کوکم کیا جاسکے ۔
اس حوالے سے تحریک انصاف قیادت کی آڈیو لیکس اورساڑھے تین سال کی مبینہ ناقص کارکردگی، مبینہ کرپشن اور ساڑھے سال میں لئے گئے قرضوں کوعوام کے سامنے لانے پرغور کیا جارہا ہےلیکن مسلم لیگ (ن)کوابھی تک یہ جانچنے میں دشواری کا سامنا ہے کہ وہ اپنی حریف تحریک انصاف کی پذیرائی کو کم کرنے میں کامیاب ہوسکے گی یا نہیں؟۔
ذرائع کا کہنا ہے کہ تحریک انصاف کی مقبولیت کی بڑی وجہ مسلم لیگ (ن) میں لیڈرشپ کا فقدان اور پارٹی میں بڑھتی ہوئی تقسیم ہے ۔مسلم لیگ(ن) کے دو وفاقی وزراء کے تحفظات پارٹی قیادت لندن تک بھی پہنچائے گئے لیکن مسلم لیگ(ن) کے قائد نواز شریف نے تحفظات کو مسترد کردیا جس کی وجہ سے پارٹی کے مرکزی رہنما جماعتی پالیسی اور مشوروں کے معاملے میں کنارہ کشی اختیار کئے ہوئے ہیں۔
