کراچی : آباد نے ملک بھر میں تعمیراتی سریے کی خریداری بند کرنے کا اعلان کردیا۔
ملک میں سریا کی تسلسل سے بڑھتی ہوئی قیمتوں پر دلبرداشتہ تعمیراتی شعبے کی نمائندہ تنظیم ایسوسی ایشن آف بلڈرز اینڈ ڈیولپرز آباد نے ایک بڑا فیصلہ کرلیا۔ گذشتہ شب رات گئے آباد کے ہنگامی اجلاس میں ممبر بلڈر ڈیولپرز نے سریا نہ خریدنے کا حلف اٹھالیا۔
چئیرمین آباد الطاف طائی کا کہنا ہے کہ کسی بھی تعمیراتی سائیٹ پر اگر سریا اترا تو آباد اس سائیٹ کے مالک بلڈر یا ڈیولپر کو ایس بی سی اے کی ضمانت نہیں دیگا۔
انہوں نے بتایا کہ حالات کا جائزہ لینے کے لیے اگلے ہفتے بھی اجلاس طلب کیا جائے گا۔ واضح رہے کہ جنوری سے اب تک فی ٹن سریے کی قیمت 73000روپے بڑھ گئی۔ سریے کی قیمت 227000 روپے سے بڑھکر 3لاکھ روپے کی سطح سے بھی تجاوز کرتے ہوئے ریکارڈ ترین سطح پر آگئی۔
