کراچی: سابق صدر جنرل (ر) پرویز مشرف نے کہا ہے کہ آئندہ عام انتخابات میں پاک سرزمین پارٹی کو ووٹ نہیں ملیں گے کیونکہ وہ جماعت عوام میں بالکل بھی مقبول نہیں ہے۔
اے آر وائی کے پروگرام سوال یہ ہے میں ماریہ میمن کے ساتھ دبئی سے گفتگو کرتے ہوئے پرویزمشرف کا کہنا تھا کہ ڈپٹی کمشنر، پولیس، تھانہ کچہری سب نواز شریف کے زیر اثر ہیں، وزیر داخلہ احسن اقبال نواز شریف کے اشارے پر میرے خلاف بول رہے ہیں، جب یہ پکے چلے جائیں گے تب میں پاکستان آنے میں آسانی محسوس کروں گا۔
سابق صدر کا کہنا تھا کہ اس وقت ملک میں پاکستان کی کوئی پارٹی نہیں ، پاک سرزمین پارٹی کو کراچی کے عام آدمی کا بھی ووٹ نہیں ملے گا، پاک سرزمین پارٹی ایم کیو ایم کا بدل نہیں ہوسکتی ہے۔
