کراچی: اسٹریٹ کرمنل کا نوجوانوں کو لوٹنا مہنگا پڑ گیا ، لیاقت آباد ٹمبر مارکیٹ میں نوجوانوں نے اسٹریٹ کرائم کی واردات ناکام بنادی، گزشتہ روز پیش آنے والے واقعہ کی سی سی ٹی وی فوٹیج منظر عام پر آگئی، فوٹیج میں پانچ نوجوانوں کو ایک ساتھ گلی میں بیٹھے دیکھا جاسکتا ہے۔
موٹر سائیکل پر سوار دو اسٹریٹ کرمنلز نوجوانوں کے پاس رکتے ہیں، ایک ڈاکو موٹر سائیکل سے اتر کر نوجوانوں کے پاس جاتا ہے، اسلحہ تان کر نوجوانوں سے موبائل فون اور نقدی لوٹتا ہے، لوٹ مار کے دوران ڈاکو ایک نوجوان پر تشدد بھی کرتا ہے، موقع پاتے ہی تمام نوجوان اسٹریٹ کرمنل کو دبوچ لیتے ہیں،موٹر سائیکل پر بیٹھا ڈاکو فرار ہوجاتا ہے، پکڑے جانے والے ڈاکو کی نوجوان خوب درگت بناتے ہیں، تشدد کے بعد ڈاکو کو لیاقت آباد پولیس کے حوالے کردیا گیا۔
پولیس حکام کے مطابق گرفتار ڈاکو کی شناخت راشد کے نام سے ہوئی جس کے قبضے سے اسلحہ برآمد کیا گیا، ملزم کے دوسرے ساتھی کی گرفتاری کے لیے چھاپے مارے جارہے ہیں۔
