لندن / ہیگ: برطانیہ کے بعد ہالینڈ کے شہر ہیگ میں چاقو بردار شخص نے حملہ کر کے متعدد کو زخمی کردیا۔
غیرملکی خبررساں ادارے کی رپورٹ کے مطابق چاقو زنی کا واقعہ ہیگ کی مارکیٹ میں پیش آیا جس کے بعد افرا تفری مچ گئی اور لوگ اپنی جان بچانے کے لیے ادھر اُدھر بھاگے، پولیس کو سرمئی رنگ کے لباس میں ملبوس 45 سے 50 سالہ شخص کی تلاش ہے، جس کے بارے میں شبہ ہے کہ وہ حملے میں ملوث ہوسکتا ہے۔
پولیس حکام کے مطابق حملے میں تین شہری زخمی ہوئے، واقعے کی تفتیش کے لیے عینی شاہدین کے بیانات بھی قلم بند کیے گئے۔ واضح رہے اس سے قبل لندن میں بھی چاقو بردار شخص نے حملہ کیا تھا، جس میں 2 افراد ہلاک اور 3 زخمی ہوگئے تھے، تاہم پولیس کی فائرنگ سے حملہ آور مارا گیا تھا۔
