متحدہ قومی موومنٹ (ایم کیو ایم) پاکستان نے وفاقی حکومت میں دوبارہ شامل ہونے کے لیے اضافی وزارت مانگنے کی کلی تردید کردی۔ ایم کیو ایم پاکستان کے سینئیر ڈپٹی کنوینر عامر خان کا کہنا تھا کہ ہم نے کسی سے وزارت ک مطالبہ نہیں کیا۔
عامر خان نے پاکستان تحریک انصاف (پی ٹی آئی) سے اضافی وزارت مانگنے کی خبر کو بے بنیاد قرار دیتے ہوئے کہا کہ یہ خبر سراسر بے بنیاد ہے، ایم کیو ایم پاکستان کو وزارت نہیں بلکہ کراچی کے مسائل کا حل چاہیے۔ ان کا یہ بھی کہنا تھا کہ جہانگیر ترین کی رہائش گاہ پر ملاقات میں کسی وزارت کی فرمائش پر نہیں کی گئی۔
اس سے قبل اطلاعات سامنے آئی تھیں کہ ایم کیو ایم پاکستان نے حکومت سے وفاقی کابینہ میں دوبارہ شمولیت پر ایک اور وزارت دینے کا مطالبہ کیا۔ متحدہ قومی موومنٹ کا کہنا تھا کہ پہلے امین الحق کو وزارت دیں پھر واپسی ہوگی۔ ایم کیو ایم پاکستان کے ذرائع کا کہنا ہے کہ جہانگیر ترین کی رہائش گاہ پر حکومت نے وزارت دینے کی یقین دہانی کروائی تھی۔
