کراچی : کراچی کے علاقے ملیر میں نیشنل ہائی وے پر سرکاری نرخوں پر سستا آٹا بیچنے والے 2 افراد ڈکیتی کے دوران مزاحمت پر ڈاکووں کی فائرنگ سے زخمی ہو گئے۔
شاہ لطیف ٹاون پولیس کے مطابق واقعہ بھینس کالونی موڑ کے قریب پیش آیا۔پولیس کے مطابق کہ موٹر سائیکل سوار مسلح ملزمان نے آٹا بیچنے والوں سے مبینہ طور پر لوٹ مار کی اور مزاحمت کرنے پر فائرنگ کر دی۔
ملزمان کی فائرنگ سے 2 افراد 30 سالہ دین محمد ولد میر علی اور 30 سالہ حسنین ولد پاک علی زخمی ہو گئے جبکہ ملزمان باآسانی فرار ہو گئے۔
زخمیوں کو فوری طور پر ایدھی ایمبولینس کے ذریعے جناح اسپتال منتقل کر دیا گیا ہے جہاں انہیں طبی امداد دی جا رہی ہے۔
