کراچی: ایم کیو ایم پاکستان کے کنوینر خالد مقبول صدیقی نے یوم کشمیر پر پیغام میں کہا کہ کشمیری عوام 1948 سے بھارتی مظالم کا سامنا کررہے ہیں، وفاقی حکومت کی ذمہ داری ہےکہ وہ پارلیمانی وفود کے ذریعے سے عالمی فورم پر اس مسئلہ کو مزید اجاگر کریں، کشمیر کا مقدمہ اقوام عالم کے سامنے موثر انداز میں پیش کیا جائے۔
انہوں نے کہاکہ انسانی حقوق کی خلاف ورزیوں، خواتین کے ساتھ ہونے والی زیادتیوں سے آگاہ کیا جائے، ایم کیو ایم پاکستان اپنا کردار ادا کرنے کو تیار ہے، کشمیری عوام کا حق خوداریت جلد ملے گا۔
ان کا کہنا تھاکہ اس کیلئے کشمیری عوام نے لازوال قربانیاں دی ہیں، وہ دن دور نہیں جب کشمیری عوام اپنی امنگوں کے مطابق آزادی کا فیصلہ کریں گے۔
