کراچی : ترجمان ایم کیو ایم پاکستان نے الیکشن کمیشن کے فیصلے پر اپنے ردِعمل میں کہا ہے کہ مہاجروں اور سندھ کے شہری علاقوں کی نمائندگی جعلی طریقے سے چھیننے کی سازش کی گئی ہے, الیکشن کمیشن نے انصاف کے تقاضوں کو پورا نہیں کیا۔
ترجمان ایم کیو ایم کا کہنا ہے کہ الیکشن کمیشن نے تمام قانونی تقاضوں کو پس پشت ڈال کر جعلی حلقہ بندیاں کی ہیں، جس سے شہری سندھ کی ایک چوتھائی آبادی حقیقی نمائندگی سے محروم رہ گئی ہے۔
انہوں نے کہا کہ غیر جانبدارانہ بلدیاتی انتخابات کا انعقاد ہی الیکشن کمیشن کی واحد ذمے داری ہے لیکن الیکشن کمیشن نے سندھ میں اپنی یہ ذمے داری پوری نہیں کی۔
ترجمان نے مزید کہا کہ ہم الیکشن کمیشن کے اس متعصبانہ فیصلے کے خلاف عدالت سمیت تمام دروازے کھٹکھٹائیں گے، ہم دیکھنا چاہتے ہیں کہ شہری سندھ کو کہاں کہاں انصاف سے محروم رکھا جاتا ہے, عدالتوں سے انصاف نہ ملا تو عوامی عدالتیں فیصلہ کریں گی۔
