کراچی:سینئر اداکار نعمان اعجاز نے حالیہ انٹرویو میں ’اسٹیبلشمنٹ‘ کے ساتھ اچھے تعلقات ہونے کا اعتراف کیا ہے۔ نعمان اعجاز نے حال ہی میں ایک سوشل میڈیا پوڈ کاسٹ میں نجی زندگی سے متعلق گفتگو کرتے ہوئے بتایا کہ کسی بھی رشتے کو بہتر کیسے بنایا جا سکتا ہے۔
انہوں نے کہا کہ وہ اپنی بیگم کو اسٹیبلشمنٹ مانتے ہیں اور ان کے ساتھ تعلقات بہت اچھے ہیں۔ میزبان نے دریافت کیا کہ ’کیا شروع سے معاملات ایسے ہی تھے؟‘ اس سوال کے جواب میں سینئر اداکار نے بتایا کہ نہیں ابتداء میں کافی لڑائی جھگڑے ہوتے تھے، کئی کئی دن تک کوئی بات نہیں ہوتی تھی لیکن پھر اس بات کا احساس ہوا کہ وہ کتنی بڑی غلطی کر رہے ہیں۔
ان کامزید کہناتھاکہ غلطی کا احساس ہونے کے بعد اب ایسا نہیں ہے، اب اگر کبھی محسوس ہو کہ کسی بات پر جھگڑا ہو سکتا ہے تو ہم دونوں کی یہ ہی کوشش ہوتی ہے کہ موضوع تبدیل کر دیا جائے۔
