کراچی : رضویہ سوسائٹی کے علاقے ہزارہ گوٹھ جعفری امام بارگاہ کے قریب گھر سے خاتون کی گلہ کٹی ہوئی لاش ملی جس کی اطلاع پر پولیس نے موقع پر پہنچ کر لاش ایدھی کے رضا کاروں کی مدد سے سول اسپتال پہنچائی ۔
ایس ایچ او وقار قیصر نے بتایا کہ قتل کی واردات دوسری منزل پر بنے ہوئے ایک کمرے کے مکان میں ہوئی تھی جبکہ مقتولہ کی شناخت 38 سالہ عذرہ کے نام سے کی گئی جبکہ ابتدائی تحقیقات میں پتہ چلا ہے کہ میاں اور بیوی میں گھریلو پریشانیوں پر جھگڑے ہوتے تھے اور شبہ ہے کہ خاتون کو اس کے شوہر عرفان نے مبینہ طور پر قتل کیا ہے ۔
مقتولہ 10 سالہ بیٹی کی ماں تھی جو کہ اس وقت گھر پر موجود نہیں تھی جبکہ ملزم اورنگی ٹاؤن میں قائم تولیہ فیکٹری میں ملازمت کرتا تھا ، واردات کے بعد ملزم موقع سے فرار ہوگیا جسے پولیس سرگرمی سے تلاش کر رہی ہے ۔
