لاہور: قومی آل راؤنڈر شاداب خان نے نکاح کرلیا جس کی اطلاع انہوں نے اپنے مداحوں کو ٹوئٹر پر دی۔ان کا نکاح پاکستان کرکٹ ٹیم کے سابق ہیڈ کوچ ثقلین مشتاق کی بیٹی سے ہوا ہے جس میں صرف قریبی رشتے دار ہی شریک ہوئے ۔
اپنے ٹویٹ میں شاداب خان نے لکھا کہ’’الحمد اللہ آج میرا نکاح تھا‘‘، یہ میری زندگی کا بہت بڑا دن تھا اورایک نئے باب کا اضافہ ہوا ہے، برائے مہربانی میرے انتخاب اور میری اہلیہ اور ہمارے خاندان کا احترام کریں۔ا نہوں نے مزید لکھاکہ ’میں اپنے مینٹور ثقلین مشتاق کے خاندان کا حصہ بن رہا ہوں جب میں نے کرکٹ کھیلنی شروع کی تب سے میں اپنی نجی زندگی کو علیحدہ رکھنا چاہتا تھا، میری فیملی نے بھی اسی عمل کو ترجیح دی ہے، میری اہلیہ کی بھی یہی خواہش ہے، وہ چاہتی ہیں کہ ان کی زندگی نجی ہی رہے۔
انہوں نے لکھاکہ میں آپ سب سے مؤدبانہ گزارش کرتا ہوں کہ میری نجی زندگی میں مداخلت نہ کی جائے ۔پھر بھی اگر آپ سلامی بھیجنا چاہتے ہیں تو میں اکاؤنٹ نمبر بھیج دوں گا۔
