کراچی: تبلیغی جماعت کا کراچی کے علاقے اورنگی میں اجتماع جاری ہے۔ دوسرے روز بڑی تعداد میں شرکا اجتماع گاہ پہنچے۔ نماز جمعہ کے موقع پر اجتماع گاہ کم پڑگئی۔
سندھ اور بلوچستان سے قافلوں کی آمد تاحال جاری ہے۔ مختلف اوقات میں نعیم شاہ، ڈاکٹر سلیم، مولوی عثمان اور مولانا عبید خورشید کے خصوصی بیانات ہوئے۔ انہوں نے کہا کہ دنیا و آخرت میں کامیابی کا راستہ صرف دین ہے، دین میں پورے داخل ہوجائیں۔ اللہ اور رسول ﷺ کے احکامات پر عمل کریں، اپنا احتساب کریں، موت سے پہلے تیاری کریں، والدین کی خدمت کریں، حقوق العباد کا خیال رکھیں، رزق حلال کمائیں، اس کی برکت سے مسائل حل ہوں گے۔
ہفتہ کو ڈاکٹر روح اللہ، پیر اعظم شاہ اور مولانا ضیاء الحق کے بیانات ہوں گے۔اس موقع پر سکیورٹی کے انتہائی سخت انتظامات کئے گئے ہیں۔ اجتماع اتوار کو خصوصی بیان و دعا کےبعد اختتام پذیر ہوگا۔
