اسلام آباد : وزیراعظم شہباز شریف نے کہا ہے کہ حکومت ملکی معیشت کو مستحکم کرنے کیلئے ٹھوس اور فوری اقدامات کر رہی ہے، پاکستان کوموسمیاتی تبدیلی کے مضر اثرات کا سامنا ہے، موجودہ حکومت کو گزشتہ حکومت کی بدانتظامی کے مسائل کے علاوہ سیلاب جیسی قدرتی آفت کا مقابلہ کرنا پڑا ، غیر ضروری درآمدات میں کمی اور بر آمدات میں اضافہ حکومت کی اولین ترجیح ہے، تمام مشکلات کے باوجود حکومت شبانہ روز محنت سے ملکی معیشت کی بہتری کیلئے کوشاں ہے۔
ان خیالات کا اظہار انہوں نے معروف بین الاقوامی مالیاتی فرم روتھ چائلڈ اینڈ کمپنی کے وفد سے گفتگو کرتے ہوئے کیا۔علاوہ ازیں وزیراعظم نے کلنکرجھیل ،عمرکوٹ میں کشتی الٹنے کے واقعہ پر گہرے افسوس اور رنج کا اظہارکیا ہے۔وزیراعظم نے زخمیوں کی جلد صحت یابی کی دعا کی اور انہیں ہرممکن طبی امداد فراہم کرنے کی ہدایت کی۔
وزیراعظم نے متعلقہ حکام کو حفاظتی انتظامات بہتر بنانے کی ہدایت بھی کی۔ مزیدبرآں وزیراعظم نے کلر کہار میں مسافر بس حادثے پر افسوس کا اظہار کرتے ہوئے جاں بحق افراد کے لواحقین سے اظہار تعزیت و ہمدردی کیا ہے۔
