کراچی: کراچی پریس کلب اور احباب حبیب جالب کی جانب سے ملک کے نامور ترقی پسند شاعر اور کراچی پریس کلب کے تاحیات رکن حبیب جالب کی یاد میں ’’حبیب جالب میلہ‘‘ منعقد کیا گیا،جس میں سابق چیئرمین سینیٹ میاں رضا ربانی، زہرہ یوسف، مصطفی قریشی، سینیٹر وقار مہدی، پنجابی زبان کے نامور شاعر بابا نجمی عالم، سندھیانی تحریک کی حور النسا پلیجو، سردار رحیم اور دیگر شاعروں، ادیبوں، سیاسی، سماجی رہنمائوں نے شرکت کی۔
اس موقع پر احباب حبیب جالب کے رہنما مجاہد بریلوی نے کہا کہ حبیب جالب شاعر ہونے کے ساتھ جمہوری، انسانی حقوق اور صحافتی آزادی کی تحریکوں میں بڑا کردار ادا کیا تھا اور احباب جالب کراچی پریس کلب کا بڑا مشکور ہیں کہ کلب نے اپنی پرانی روایت کو برقرار رکھتے ہوئے حبیب جالب کو یاد کرنے میں اپنا کردار ادا کیا ہے۔
کراچی پریس کلب کے صدر سعید سربازی اور سیکرٹری شعیب احمد نے کہا کہ حبیب جالب اس ملک کا بڑا شاعر تھا اور کراچی پریس کلب اس کا اپنا گھر تھا، کراچی پریس کلب نے اس ادبی میلے کا انعقاد کرکے حق ادا کیا ہے۔
حبیب جالب میلے میں تحریک نسواں کی ٹیم نے شیما کرمانی کی قیادت میں حبیب جالب کے اشعار پر ٹیبلو پیش کیا، جبکہ لال بینڈ،سندھیانی تحریک کی بچیوں اور دیگر گروپوں نے حبیب جالب کی شاعری گانے کے ساتھ اپنی ٹیبلوز پیش کیے۔میلے میں ادبی اور حبیب جالب کی کتابوں کا اسٹال بھی لگایا گیا۔
