لانڈھی : ڈاکوئوں نے مزاحمت پر ایک اور شہری کی جان لے لی

کراچی :لانڈھی میں ڈاکوئوں کی فائرنگ ایک شخص جاں بحق ہوگیا،ایریاٹو بی میں ڈکیتی میں مزاحمت پر جنرل اسٹور کا مالک 45 سالہ اکرم ولد عبدالوہاب سینے پرگولی لگنے سے شدید زخمی ہوگیاجبکہ ملزمان موقع سے فرار ہوگئے۔
مضروب کو اہل محلہ شدید زخمی حالت میں لیاقت نیشنل اسپتال لے کرپہنچے جہاں وہ دم توڑگیا، مقتول کی لاش ضابطے کی کارروائی کیلئے جناح اسپتال منتقل کی گئی ،اطلاع ملنے پر پولیس موقع پرپہنچی اور واقعے کے حوالے سے پوچھ گچھ کی۔
ایس ایچ او فرخ ہاشمی کے مطابق موٹرسائیکل پر سوارد وملزمان آئے اور ایک ملزم موٹرسائیکل سے اترکر مقتول کے ارشد حذیفہ جنرل اسٹورمیں داخل ہوا،اس دوران مغرب کی نماز پڑھ کر جیسے ہی اکرم پہنچا تو اس نے ایک ملزکو پکڑ لیا،جس پر اس کے ساتھی جو موٹرسائیکل پر بیٹھا تھا اس نے اکر م پر فائرنگ کی جو سینے میں لگی اور بعدازاں جان لیوا ثابت ہوئی،مقتول تین بچوں کا باپ اور مذکورہ جنرل اسٹور کامالک تھا۔
علاقے سے ملنے والی اطلاعات کے مطابق جس وقت ملزمان جنرل اسٹور کے باہر سے فرارہورہے تھے اس دوران اوپری منزل سے خاتون نے ملزمان پر گملا بھی پھینکا جس سے ایک ملزم گملا سرپر گرنے سے زخمی بھی ہوا،اس حوالے سے پولیس مزید جھان بین کررہی ہے ۔