ریاض : متحدہ عرب امارات کے خلاباز سلطان النیادی نے بین الاقوامی خلائی اسٹیشن سے سعودی عرب کی مسجد الحرام اور مسجد نبوی کی ویڈیو شیئر کردی۔
اماراتی خلاباز سلطان النیادی اس وقت بین الاقوامی اسپیس اسٹیشن میں ناسا کے 6 ماہ طویل مشن پر موجود ہیں اور وہیں سے وہ اپنے ٹوئٹر اکاؤنٹ سے باقاعدہ اپ ڈیٹس شیئر کر تے رہتے ہیں۔
متحدہ عرب امارات کے خلاباز سلطان النیادی خلا سے خوبصورت تصاویر شیئر کر رہے ہیں اور حال ہی میں انہوں نے 27 رمضان کی رات روشن ہونے والی مکہ، مدینہ اور جدہ کی ایک ویڈیو پوسٹ کر کے پوری دنیا کے مسلمانوں کی توجہ حاصل کر لی ہے۔
اماراتی خلاباز نے ویڈیو شیئر کرتے ہوئے کہا کہ ’یہ مدینہ ہے، وہ شہر جہاں نبی اکرم صلی اللہ علیہ وسلم نے اپنے پیارے لوگوں کے ساتھ ہجرت کی۔
اس وقت ویڈیو میں شہر کی چمکتی ہوئی روشنیوں اور اس کی کئی سڑکوں کی واضح تصویر دکھائی گئی۔
