کراچی:محکمہ صحت سندھ نے عید الاضحی کے قریب کانگووائرس کے کیسز بڑھنے کا امکان ظاہر کردیا ہے۔
کراچی میں ایک شخص میں کانگو وائرس کی تصدیق ہوگئی ، جسے نجی اسپتال میں داخل کردیا گیا ہے۔
محکمہ صحت نے بتایا کہ او پی ڈی میں آنے والے مریض میں کانگووائرس کی تشخیص ہوئی تاہم عید الاضحی کےقریب کانگووائرس کےکیسز بڑھنے کا امکان ہے۔
خیال رہے یہ وائرس مویشی کی کھال سے چپکی چیچڑوں میں پایا جاتا ہے، چیچڑی کے کاٹنے سے وائرس انسان میں منتقل ہوجاتا ہے، قومی ادارہ صحت کے مطابق نیرو نامی وائرس انسانی خون، تھوک اور فضلات میں پایا جاتا ہے جو انسانوں میں بخار پھیلاتا ہے۔
تیز بخار، کمر، پٹھوں، گردن میں درد، قے، متلی، گلے کی سوزش اور جسم پر سرخ دھبے کانگو کی علامات ہیں۔جانوروں کے پاس جانے سے گریز کیا جائے، مویشیوں کے پاس جانے کی ضرورت پیش آئے تو دستانوں کا استعمال ضرور کیا جائے۔
کانگو وائرس کے خاتمے کے لیے تاحال کوئی ویکسین ایجاد نہیں ہوئی ہے لہذا قبل اس وقت احتیاط اور مرض ظاہر ہوجانے کی صورت میں بروقت علاج ہی سے اس مرض کا خاتمہ ممکن ہے۔
