نیوزی لینڈ کے مقبول اور دنیا کے سب سے مہنگے رگبی اسٹار کھلاڑی سونی بل ولیمز نے کہا ہے کہ میرے پاس دنیا کی ہر چیز موجود تھی مگر ایک کھوکھلا پن محسوس ہوتا تھا، اسلام قبول کرنے کے بعد میں فخر سے کہتا ہوں کہ اب سب مل گیا۔
برطانوی میڈیا سے گفتگو کرتے ہوئے ولیمز کا کہنا تھا کہ دس برس قبل میری زندگی میں شہرت تھی، رنگینیاں تھیں، لیکن میں کھوکھلا پن محسوس کرتا تھا، اسلام قبول کرنے اور شرعی تعلیمات پر زندگی گزارنے کے بعد میری زندگی مکمل ہوگئی مگر چند لوگ چاہتے ہیں کہ میں اسلام قبول کرنے پر شرمندگی کا اظہار کروں لیکن مجھے اس ہر فخر ہے کہ مجھے اللّٰه مل گیا۔ اللّٰه تعالیٰ کی تعریف بیان کرتے ہوئے کہا کہ الحمد اللّٰه کا مطلب سب کچھ ہے۔ پانی کا گلاس پینا الحمد اللّٰه، آپ سے بات کرنے کا موقع ملنا الحمد اللّٰه، بیوی اور بچوں سے ملنا الحمد اللّٰه، میرا خالق ہمیشہ میرے ذہن میں رہتا ہے۔
انہوں نے کہا کہ عمرے کی ادائیگی بہت ہی منفرد تجربہ تھا، مکہ میں بیت اللّٰه کے سامنے ہونا اور مدینہ کے سکون کی بات ہی کچھ اور ہے، یہاں ہر رنگ اور نسل کے لوگ احرام میں ہوتے ہیں جو مساوات کی بہترین مثال ہے۔
