کراچی میں کرونا مثبت کیسز کی شرح 10 فیصد سے زائد، پابندیوں سے متعلق بڑا فیصلہ
کراچی: صوبائی وزیرصحت نے ایک روز قبل کرونا ٹاسک فورس کے اجلاس میں کراچی سمیت سندھ کے دیگر علاقوں اور اضلاع کے کرونا مثبت کیسز کے اعداد و شمار جاری کیے۔
انہوں نے بتایا کہ کراچی میں کرونا مثبت کیسز کی شرح 10.42 فیصد تک پہنچ چکی ہے،صوبائی وزیر صحت ڈاکٹر عذرہ پیچوہو نے شرکا کو بتایا کہ کراچی میں گزشتہ 7 روز کے دوران کرونا مثبت کیسز کی شرح 10.42 فیصد تک پہنچ گئی جبکہ حیدرآباد میں یہ شرح 14.52 فیصد تک پہنچ گئی اور سکھر میں مثبت کیسز کی شرح 5.48 فیصد تک پہنچ چکی ہے۔
صوبائی وزیرصحت نے بتایا کہ ’ اپریل کے مہینے میں کرونا سے متاثرہ 154 مریض انتقال کر گئے‘۔
اجلاس میں وزیراعلیٰ سندھ نے کرونا ایس او پیز کی خلاف ورزیوں پر برہمی کا اظہار کرتے ہوئے پولیس اور کمشنر کراچی کو ایس او پیز پر سختی سے عمل درآمد کروانے کے احکامات جاری کیے۔
وزیراعلیٰ سندھ کا کہنا تھا کہ ’صوبائی وزرا شہر کا دورہ کریں اور ایس او پیز پر عمل درآمد میں مقامی انتظامیہ کی مدد کروائیں‘۔ مراد علی شاہ نے کراچی کے ضلع شرقی اور حیدرآباد میں ایس او پیز مزید سخت کرنے کے اقدامات کی ہدایت بھی کی۔
