کراچی : سابق قومی کپتان اظہر علی کے اعزاز میں الوداعی تقریب کا انعقاد بھی کیا گیا جس میں ساتھی کھلاڑیوں نے بھی شرکت کی۔
تقریب میں قومی کرکٹ ٹیم کے بیٹر اظہر علی کو چیئرمین پاکستان کرکٹ بورڈ کی جانب سے یادگاری شیلڈ پیش کردی گئی۔ س
ماجی رابطے کی سائٹ ٹوئٹر پر پاکستان کرکٹ بورڈ (پی سی بی) نے آفیشل اکاؤنٹ پر اظہر علی کی فیملی کے ہمراہ یادگاری شیلڈ کی تصویر شیئر کی۔
رمیز راجہ نے سینئر بیٹر کی خدمات کو خراج تحسین کیا جس پر اظہر علی نے بورڈ کی جانب سے پزیرائی پر اظہار تشکر کیا۔
کپتان بابر اعظم اور آل راؤنڈر شاداب خان نے ٹوئٹس کے ذریعے انہیں خراجِ تحسین پیش کیا۔ کپتان بابر اعظم نے اپنی اور اظہر علی کی گلے لگاتے ایک تصویر شیئر کی اور لکھا ایک بہت اچھا کیرئیر اختتام پذیر ہے، میں نے آپ کے ساتھ کھیلتے ہوئے بہت کچھ سیکھا۔
انہوں نے ٹوئٹ میں مزید لکھا کہ ہیپی ریٹائرمنٹ اجو بھائی۔ علاوہ ازیں شاداب خان نے اپنی ٹوئٹ میں اظہر علی کی تصویر شیئر کرتے ہوئے انہیں مبارکباد پیش کی اور لکھا شاندار کیرئیر پر آپ کو مبارک ہو، آپ جیسی مثالی شخصیت کم آتی ہے۔
انہوں نے مزید لکھا کہ میں نے آپ سے بہت کچھ سیکھا ہے اور ہم کبھی آپ کے بغیر چیمپئنز ٹرافی نہ جیت سکتے، آپ پاکستان کے حقیقی لیجنڈ ہیں۔
