کراچی: کراچی والے تیار ہوجائیں،13 جنوری سے سردی کی شدت بڑھے گی، پارہ سنگل ڈیجٹ میں آنے والا ہے۔موسمیاتی تجزیہ کارجواد میمن کے مطابق 14 جنوری سے سردی کی لہر پورے ملک کو اپنی لپیٹ میں لے سکتی ہے۔انہوں نے کہاکہ 13 جنوری سے کراچی میں سردی کی شدت میں اضافہ ہونا شروع ہو جائے گا، 14 سے 17 جنوری کے دوران کراچی میں رات کا درجہ حرارت سنگل ڈیجٹ میں آ سکتا ہے۔
جواد میمن نے بتایا کہ اس دوران کراچی کے مضافات میں درجہ حرارت 4 سے 6 ڈگری سینٹی گریڈ تک بھی گر سکتا ہے۔انہوں نے مزید بتایا کہ سردی کی یہ لہر 18 جنوری تک ملک پر اثرانداز رہے گی، جس کی شدت بلوچستان میں زیادہ رہے گی۔جواد میمن نے بتایا کہ اس دوران سندھ اور پنجاب کے میدانی علاقوں میں درجہ حرارت 0 سے 2 ڈگری سینٹی گریڈ تک گر سکتا ہے۔
دوسری جانب چیف میٹرولوجسٹ کراچی سردار سرفراز کے مطابق مغربی ہوائوں کے سلسلے کے سبب 12 جنوری سے کراچی سمیت سندھ بھر میں سردی کی نئی لہر متوقع ہے جس میں کم سے کم پارہ سات ڈگری تک گرسکتا ہے اور سرد ہوائیں ایک ہفتہ جاری رہ سکتی ہیں۔
ان کا کہنا تھاکہ نئے مغربی سسٹم کے نتیجے میں 12 جنوری سے کراچی سمیت سندھ بھر میں سردی کی شدید لہر متوقع ہے، نئی مغربی لہر کی وجہ سے کراچی کا کم سے کم پارہ(سنگل ڈیجیٹ میں 7 ڈگری) ریکارڈ ہوسکتا ہے، اس دوران کراچی اور دیہی سندھ کے اضلاع میں یخ بستہ ہوائیں چل سکتی ہیں، سردی کی نئی لہر ایک ہفتے تک برقرار رہ سکتی ہے۔
