لاہور: گورنر پنجاب محمد بلیغ الرحمن سے یہاں گورنر ہائوس لاہور میں وزیر اعلی سندھ سید مراد علی شاہ نے ملاقات کی۔ملاقات کے دوران سندھ میں سیلاب زدگان کی بحالی ، تعلیم کے فروغ اور سیاسی صورتحال سمیت مختلف امور پر تبادلہ خیال کیا گیا۔
اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ اتحادی حکومت نے مشکل حالات میں حکومت کی ذمہ داری لی اور ملک کو دیوالیہ ہونے سے بچایا۔انہوں نے کہا کہ اس وقت سب سے زیادہ ضرورت باہمی اتحاد، جذبہ حب الوطنی اور جمہوریت کو مضبوط کرنا ہے۔انہوں نے کہا کہ مضبوط پاکستان ہی ہم سب کی اولین ترجیح ہونا چاہیے۔
گورنر پنجاب نے کہا کہ ملک کی ترقی کے لیے ٹیکنیکل ایجوکیشن کو فروغ دینے کی ضرورت ہے کیونکہ فنی تعلیم ہی انسانی ترقی کا قابل اعتماد وسیلہ اورملکی خوشحالی کا ضامن ہے۔
انہوں نے کہا کہ دور دراز علاقوں میں جہاں باقاعدہ سکولز نہیں ہیں غیر رسمی تعلیم کے ذریعے وہاں بچوں کو کم وسائل میں تعلیم دی جا سکتی ہے۔ گورنر پنجا ب نے کہا کہ آٹ آف سکول چلڈرن کی تعداد کم کرنے کے لیے بھرپور اقدامات کرنے کی ضرورت ہے ۔ وزیر اعلی سندھ سید مراد علی شاہ نے کہا کہ کچھ عناصر ملک میں عدم استحکام پیدا کرناچاہتے ہیں۔
انہوں نے کہا حکومت اس وقت بہت سے چیلنجز سے نبرد آزما ہے۔حکومت کو سیلاب متاثرین کی بحالی،ملک کے معاشی حالات و دیگر چیلنجز کا سامنا ہے۔ ملک کے حالات کے پیش نظر ایک سیاسی جماعت کے علاہ تمام سیاسی جماعتیں اس بات پر متفق ہیں کہ الیکشن پورے ملک میں ایک ہی وقت پر ہوں۔
وزیر اعلی سندھ نے کہا کہ سیلاب زدگان کے لیے گھروں کی تعمیر شروع کردی ہے۔ وزیر اعلی نے مزید کہا کہ سندھ کے عوام کے لیے پبلک ٹرانسپورٹ کی سہولیات میں اضافہ کیا گیا ہے۔اس موقع پر گورنر پنجاب محمد بلیغ الرحمن نے وزیر اعلی سندھ سید مراد علی شاہ کو گورنر ہاس کے مختلف حصوں کا وزٹ بھی کروایا۔
