کراچی: ضلع ویسٹ پولیس نے خود کو آرمی میجر ظاہر کرنے والے جعلساز کو گرفتار کرلیا۔
ضلع ویسٹ پولیس کے مطابق ملزم تیمور علی ولد عبدالعزیز کو دوران چیکنگ کاروائی کرکے گرفتار کیا گیا۔ پولیس چیکنگ کے دوران بھی ملزم نے خود کا تعارف بطور آرمی میجر کروایا تھا۔
پولیس کا کہنا ہے کہ ملزم نے زیر استعمال کار پر پاکستان آرمی کی جعلی نمبر پلیٹ لگائی ہوئی تھی جبکہ ملزم کی کار سے آرمی یونیفارم، جعلی اسٹیمپس اور دستاویزات بھی برآمد ہوئے ہیں۔
گرفتار ملزم کے خلاف ضابطے کا مقدمہ درج کرکے تفتیش کا آغاز کردیا گیا ہے۔ بعدازاں گرفتار ملزم سے برآمدہ سامان کے متعلق معلومات بھی حاصل کی جارہی ہیں۔
