اسلام آباد: حکومت نے امیر طبقے سے پٹرول پر 75 روپے فی لیٹر اضافی وصول کرکے پیکیج متعارف کرانے کی سمری تیار کرلی ہے۔ پٹرولیم ڈویژن نے کابینہ کی اقتصادی رابطہ کمیٹی کو منظوری کیلئے سمری بھیج دی ہے۔
ذرائع کے مطابق حکومت نے موٹر سائیکل سواروں اور چھوٹی کاروں کے مالکان کو ریلیف دینے کیلئےآئی ایم ایف کو پٹرول سبسڈی ختم کرنے کی یقین دہانی کے باوجود سمری پیش کر دی ہے۔ حکومت نے ان صارفین سے 75 روپے فی لیٹر تک اضافی وصول کرنے کا منصوبہ بنایا ہے۔
فروری میں وزیر اعظم نے موٹرسائیکل سواروں اور 800 سی سی تک کے کار مالکان کو ریلیف دینے کیلئے 800 سی سی سے اوپر کی گاڑیاں رکھنے والے امیر طبقے سے 50 روپے فی لٹر زیادہ وصول کر کے پیٹرول پر سبسڈی دینے کی منظوری دی تھی۔
