بھارت کی متنازع ترین فلم کے پوسٹرز جاری، بھارتیوں‌کا حیران کن ردعمل

بولی وڈ فلم ’پدماوتی‘ کافی عرصے سے خبروں کی زینت بنی ہوئی ہے، کبھی اس فلم کی شوٹنگ کے دوران سیٹس پر حملے ہوتے ہیں تو کبھی مرکزی کرداروں کی منفرد جھلک مداحوں کو اپنے سحر میں جکڑ لیتی ہے اور اب فلم کے تیسرے اور نہایت اہم اداکار رنویر سنگھ کے انداز کی پہلی جھلک بھی ریلیز کردی گئی۔

رنویر سنگھ فلم ’پدماوتی‘ میں علاؤ الدین خلجی کا کردار ادا کررہے ہیں، یہ ان کے کریئر کا پہلا منفی کردار بھی ہے اور اس حوالے سے یہی کہا گیا تھا کہ فلم میں ان کا انداز نہایت انوکھا اور خطرناک ہوگا۔

اداکار نے فلم سے متعلق اپنے 2 پوسٹرز ٹوئٹر پر شیئر کیے اور یہ کہنا غلط نہیں ہوگا کہ وہ رنویر سنگھ نہیں بلکہ واقعی اصل علاؤ الدین خلجی نظر آرہے ہیں۔