لاہور: وزیراعظم کے معاونِ خصوصی برائے احتساب شہزاد اکبر نے نیب اعلان اور فیصلے سے قبل ہی فیصل واؤڈا کو اثاثے چھپانے کے معاملے میں کلین چٹ دے دی۔
ایک روز قبل لاہور میں دورانِ پریس کانفرنس شہزاد اکبر سے صحافی نے فیصل واؤڈا کے اثاثے چھپانے سے متعلق سوال کیا جس پر وزیراعظم کے معاونِ خصوصی برائے احتساب نے کھل کر جواب دیتے ہوئے واؤڈا کو کلین چٹ دی۔
شہزاد اکبر کا کہنا تھا کہ وفاقی وزیر کی تمام ملکی و غیر ملکی جائیدادیں ڈکلیئرڈ ہیں، میرے خیال سے جن جائیدادوں کا تذکرہ کیا جارہا ہے کہ وہ کاغذات میں ظاہر ہیں۔
یاد رہے کہ گزشتہ دنوں نامور صحافی احمد نورانی نے واؤڈا کی ظاہر نہ کی جانے والی جائیدادوں کے حوالے سے تحقیقاتی رپورٹیں شائع کی تھیں، جن میں بتایا گیا تھا کہ وفاقی وزیربرائے آبی وسائل کے لندن میں فلیٹس ہیں جبکہ انہوں نے پاکستان میں بھی اپنے ڈرائیور کے نام پر جائیدادیں بنائی ہوئی ہیں۔
معاونِ خصوصی برائے احتساب کا ہکنا تھا کہ فیصل واؤڈا اور خسرو بختیار کے خلاف شکایات نیب میں تصدیق کے مراحل پر ہیں، پاکستان میں گرے پراپرٹیز کسی سے ڈھکی چھپی نہیں لہذا اس حوالے سے کچھ نہیں کہا جاسکتا۔
