کراچی(اسٹاف رپورٹ) کراچی کنٹریکٹرز ایسوسی ایشن نے سابق وزیر اعلی سندھ کی صاحبزادی نفیسہ شاہ کے مبینہ کوٹے پر ضلع وسطی میں تعینات کرپٹ میونسپل کمشنر فہیم خان کو فوری برطرف کرنے کا مطالبہ کردیا۔
کراچی کنٹریکٹرز ایسوسی ایشن کے رہنما عبدالرحمان کا کہنا تھا کہمیونسپل کمشنر ضلع وسطی اپنے اختیارات کا ناجائز فائدہ اٹھاتے ہوئے کنٹریکٹرز کو بلیک میل کرنے کی کوشش کر رہے ہیں، ضلع وسطی میں ٹھیکیداروں کے کروڑوں روپے پھنسے ہوئے ہیں جن کی ادائیگیوں کیلئے کنٹریکٹرز کے ساتھ نازیبا رویہ اختیار کیا جارہا ہے۔
اُن کا کہنا تھا کہ طاقت کے نشے میں چور میونسپل کمشنر فہیم خان نے گذشتہ روز کنٹریکٹرز کو مغلظات (گندگی گالیاں) بکیں، ٹھیکیدار لاوارث نہیں کسی کی دھونس دھمکیوں اور بلیک میلنگ کو اب برداشت نہیں کیا جائے گا، کنٹریکٹرز کو مغلظات بکنے والے میونسپل کمشنر فہیم خان کو سندھ حکومت لگام دے، اپنے ہوش وہواس میں نہ رہنے والے میونسپل کمشنر سندھ حکومت کیلئے بھی بدنامی کا باعث بن رہے ہیں۔
جنرل سیکریٹری نے مطالبہ کیا کہ وزیر اعلی سندھ اور وزیر بلدیات میونسپل کمشنر فہیم خان کیخلاف محکمہ جاتی کارروائی کرنے کے ساتھ ساتھ فوری عہدے سے برطرف کریں، کروڑوں روپے کے واجبات ہونے کے باوجود ٹھیکیدار شہر کی ترقی کیلئے اپنا کردار ادا کررہے ہیں۔
