کراچی:گورنرسندھ کامران خان ٹیسوری سے پیر کو متحدہ قومی موومنٹ،پاک سرزمین پارٹی اورتنظیم بحالی کمیٹی ایم کیو ایم سربراہوں نے ملاقات کی تھی جس میں بلدیاتی انتخابات کی تاریخ کے حتمی اعلان کے بعد کی صورتحال کا تفصیلی جائزہ لیاگیا۔ ذرائع سے ملنے والی اندرونی کہانی کے مطابق اجلاس میں گورنر نے واضح پیغام دیا کہ بلدیاتی الیکشن میں ایم کیوایم کے تمام ڈھڑوں کو یکجا ہونا ہی پڑے گا ورنہ شہر کا بلدیاتی مینڈیٹ بھی ہاتھ سے نکل جائے گا ۔
گورنر نے اس ضرورت پر زور دیاکہ کسی بھی طرح اتحاد کی فضا قائم کرکے صورتحال کا ادراک کیا جائے اور الیکشن کے لئے میدان خالی چھوڑنے یا منقسم ہونے سے بچانے کے مشکل فیصلے لئے جائیں۔ متحدہ قومی موومنٹ کے کنوینرڈاکٹرخالد مقبول صدیقی،پی ایس پی کے چیئرمین مصطفی کمال،تنظیم بحالی ایم کیو ایم کے سربراہ ڈاکٹرفاروق ستارملاقات میں موجود تھے،تینوں جماعتوں کے سربراہوں نے بلدیاتی انتخابات کے سلسلے میں الیکشن کمیشن کے فیصلے پرتحفظات کا اظہارکیا۔
گورنرسندھ نے انہیں اس سلسلے میں وفاقی حکومت سے بات کرنے اورتحفظات وفاقی حکومت تک پہنچانے کی یقین دہانی کرائی۔
