لاہور: ڈراموں کی مقبول اداکارہ انمول بلوچ نے عزم ظاہر کیا ہے کہ اگر انہوں نے فلموں میں اداکاری بھی شروع کردی تو وہ کسی بھی شرط پر آئٹم سانگ میں پرفارمنس نہیں کریں گی۔ انہوں نے بتایا ہے کہ وہ جلد ہی بڑی سکرین پر بھی دکھائی دیں گی۔
ایک انٹرویو میں انمول بلوچ نے ایک سوال کے جواب میں اعتراف کیا کہ اب پاکستانی ڈراموں کا سکرپٹ پہلے کی طرح جاندار نہیں رہا، خواتین کے لیے ایک جیسے ہی کردار لکھے جا رہے ہیں ،اچھے مواد کی تخلیق نہ ہونا اداکاروں کی نہیں بلکہ کہانی کاروں کی ذمہ داری ہے ۔
انمول بلوچ نے سوشل میڈیا پر شوبز شخصیات اور خصوصی طور پر اداکاراؤں پر کی جانے والی تنقید پر بھی بات کی اور کہا کہ اس میں کوئی دو رائے نہیں کہ اداکاراؤں کو زیادہ تنقید کا نشانہ بنایا جاتا ہے لیکن اب بات آگے بڑھ چکی ہے اوراب شخصیات کی کردار کشی بھی کی جاتی ہے سوشل میڈیا پر دوسروں کی کردار کشی نہیں کی جانی چاہیے۔
