کراچی کے علاقے اورنگی ٹاؤن میں گھریلو ناچاقی پر ایک شخص نے مبینہ طور پر اپنی اہلیہ اور دو بچوں سمیت چار افراد کو قتل کردیا۔
پولیس کے مطابق افسوس ناک واقعہ اورنگی ٹاؤن کے علاقے منصور نگر میں پیش آیا جہاں ملزم نے گھریلو جھگڑے کے بعد مبینہ طور پر بیوی، دو بچوں اور سالے کو قتل کیا، بعد ازاں خود بھی خود کشی کی کوشش کی۔
ان کا کہنا تھا کہ ملزم نے اہلیہ سے جھگڑے کے دوران اپنے اہلخانہ پر کلہاڑی کے وار کیے جس کی زد میں اس کا بیٹا اور بیٹی بھی آئے۔
پولیس نے بتایا کہ ملزم کو زخمی حالت میں گرفتار کرلیا گیا ہے، جس کی شناخت منان کے نام سے ہوئی۔
انھوں نے بتایا کہ مرنے والے بچوں کی عمریں 3 سے 5 سال کے درمیان تھیں۔
سینئر سپریٹنڈنٹ ضلع غربی ناصر آفتاب نے بتایا کہ بچوں کا قتل والد نے کیا، اور واقعہ گھریلو ناچاقی کے دوران پیش آیا۔
ان کاکہنا تھا کہ ملزم کو ہسپتال سے گرفتار کیاگیا جبکہ اس نے پولیس کے سامنے اعتراف جرم کرلیا ہے۔
سینئر پولیس افسر نے بتایا کہ مقتولہ ملزم کی دوسری بیوی تھی۔
