پشاور: پشاور پولیس لائنز کی مسجد کے اندر خودکش دھماکے کے نتیجے میں شہید ہونے والوں کی تعداد 59 ہوگئی جبکہ 157 زخمی ہیں، شہدا میں امام مسجد بھی شامل ہیں ۔
رات گئے جاری آپریشن کے نتیجے میں ملبے سے مزید تین زخمیوں کو نکال لیا گیا جنہیں ہسپتال منتقل کردیا گیا، مزید افراد کو نکالنے کے لیے ہیوی مشینری کی مدد سے سرچ آپریشن جاری ہے تاہم مزید پانچ افراد کے ملبے تلے دبے ہونے کی اطلاعات ہیں۔
شہدا اور زخمیوں میں بیشتر پولیس اہلکار ہیں ، دھماکے کے بعدتمام ہسپتالوں میں ایمرجنسی نافذ کردی گئی۔
دھماکے کےبعدقانون نافذ کرنے والے اداروں نے علاقے کو گھیرے میں لے لیا، بم ڈسپوزل سکواڈ کا عملہ بھی موقع پر پہنچ گیا۔ پولیس اور حکومت نے ناقص سکیورٹی کا اعتراف کرلیا ۔ پاکستانی طالبان (ٹی ٹی پی)نے سوشل میڈیا پر پشاور خود کش دھماکے کی ذمہ داری قبول کرلی ۔ ٹی ٹی پی نے دعویٰ کیا کہ یہ خود کش دھماکہ ہم نے کیا ہے اور یہ حملے جاری رہیں گے ۔
