کراچی: امیر جماعت اسلامی کراچی حافظ نعیم الرحمن نے کہا ہے کہ اہل کراچی نے جماعت اسلامی کو جو مینڈیٹ دیا ہے اس پر شب خون اور نتائج میں تبدیلی و دھاندلی کسی صورت قبول نہیں کریں گے،ہم کراچی کی نمبر ون پارٹی ہیں،ہمارے ووٹ بھی سب سے زیادہ ہیں اور نشستیں بھی۔
ادارہ نورحق میں پریس کانفرنس سے خطاب کرتے ہوئے انہوں نے کہاکہ مسئلہ صرف چند یوسیز کا نہیں بلکہ کراچی کے مینڈیٹ اور اہل کراچی کے مستقبل کا مسئلہ ہے،الیکشن کمیشن اگر دباؤ میں آیا تو اس سے بھی ہماری آئینی اور قانونی جنگ ہوگی، الیکشن کمیشن کی کارکردگی سوالیہ نشان بن رہی ہے۔
ان کا کہنتا تھاکہ کراچی منی پاکستان ہے اور یہاں کے بلدیاتی انتخابات کے نتائج بہت اہمیت کے حامل ہیں اس لیے اُمید ہے کہ7 فروری کی سماعت میں چیف الیکشن کمشنر بھی موجود ہوں گے اور آئین و قانون کی بنیاد پر حق اور انصاف پر مبنی فیصلہ کیاجائے گا،قومی اسمبلی کے ضمنی انتخابات جن کا اس وقت ملک اور قوم کو کوئی فائدہ نہیں، ان کے شیڈول کااعلان تو کردیا گیا مگر کراچی میں مختلف امیدواروں کے انتقال کے باعث ملتوی شدہ 11نشستوں پر انتخابی شیڈول کا اعلان نہیں کیا جارہا ہے اور پورا انتخابی عمل تاخیر کا شکار ہورہا ہے۔
انہوں نے کہاکہ نئی مردم شماری میں بھی اگر ماضی کی طرح جعل سازی کی گئی تو ہم اس کو بے نقاب کریں گے۔ اہل کراچی ہمارے ساتھ ہیں ان کے ساتھ مل کر کراچی کی آبادی، کراچی کی نمائندگی و سائل اور مینڈیٹ کا دفاع کریں گے۔
