کراچی: صدر مملکت ڈاکٹر عارف علوی نے ایوان صدر میں منعقدہ سول ایوارڈز تقسیم کرنے کی تقریب میں گورنر سندھ کامران خان ٹیسوری کو خدمات عامہ کے شعبہ میں ان کی کاوشوں پر تمغہ امتیاز کا اعزاز عطا کیا۔
کامران خان ٹیسوری ایک معروف کاروباری اور مخیر شخصیت بھی ہیں اور وہ 9 دفعہ بہترین ایکسپورٹرز ٹرافی اور تین مرتبہ بزنس مین آف دی ایئر کا ایوارڈ حاصل کرچکے ہیں، اس کے علاوہ ایک مرتبہ گولڈن سن آف دی کنٹری کا اعزاز بھی انہیں دیا گیا ہے۔
وزیر اعظم پاکستان محمد شہباز شریف نے تمغہ امتیاز ملنے پر گورنر سندھ کو مبارکباد دیتے ہوئے کہا کہ ایوارڈ آپ کی خدمات کا اعتراف ہے۔ گورنر سندھ نے کہا کہ اس ایوارڈ کے لئے اللہ تعالی کے حضور سر بہ سجود ہوں۔
انہوں نے اس عزم کا اظہار کیا کہ وہ صوبہ کے عوام کے مسائل کے حل کے لئے مزید محنت اور لگن سے کام کریں گے۔
