کراچی: محکمہ موسمیات نے کراچی میں بارش کا سسٹم 2 مئی تک فعال رہنے کی پیش گوئی کی ہے۔ہفتےکی شب مختلف علاقوں میں اچانک کالی گھٹائیں چھانے سے تیز بارش جبکہ ضلع ملیر میں بارش کے ساتھ ژالہ باری ہوئی۔
محکمہ موسمیات کے مطابق لیاری، بلدیہ ٹاؤن، اولڈ سٹی ایریا، گارڈن ایسٹ، گارڈن ویسٹ، نشتر روڈ، رام سوامی، رنچھوڑ لائن، سولجر بازار، اورنگی ٹاون، گلشن اقبال، لیاقت آباد اور گلستان جوہر سمیت دیگر علاقوں میں بارش ہوئی اورموسم خوشگوار ہوگیا جبکہ گرمی کی شدت میں کمی آگئی۔
مختلف علاقوں میں ہلکی اور تیز بارش کے باعث بجلی کی فراہمی بھی معطل ہوگئی، شہر میں 300 سے زائد فیڈرز متاثر ہوگئے۔محکمہ موسمیات نے شہر میں بارش کا سسٹم 2 مئی تک فعال رہنے کی پیش گوئی کی ہے۔آج یکم مئی کراچی میں گرج چمک کے ساتھ موسلادھار بارش ہونے کا امکان ہےجبکہ منگل کو گرج چمک کے ساتھ ہلکی بارش ہونے کی توقع ہے۔
مغربی ہواوں کی لہر جنوبی بلوچستان اور سندھ پر برقرار ہے جبکہ سسٹم کا پھیلاو شمالی بحیرہ عرب تک پھیلا ہوا ہے۔
دیہی سندھ کے مختلف اضلاع میں بھی بارش کا سسٹم 2 مئی تک بارشوں کا سبب بن سکتا ہے۔ اس کے زیر اثر گرج چمک کے ساتھ موسلادھار بارشیں متوقع ہیں۔
دیہی سندھ کے کچھ اضلاع میں ژالہ باری اور گرد وغبار کے طوفان جیسی صورتحال کا امکان ہے۔
