اسلام آباد: فلاح انسانیت فاؤیشن کے نام سے فلاحی کام اور کشمیر آزادی کے لیے متحرک جماعت الدعوۃ نے نئی سیاسی جماعت بنانے کا اعلان کردیا۔
نیشنل پریس کلب میں صحافیوں سے گفتگو کرتے ہوئے سیف اللہ خالد نے بتایا کہ جماعت الدعوۃ اور فلاح انسانیت فاؤنڈیشن اب ملی مسلم لیگ کے نام سے سیاست میں بھرپور طریقے سے حصہ لے گی۔
اس موقع پر ملی مسلم لیگ کے ذمہ داران کے ناموں کا بھی اعلان کیا گیا جس کے مطابق پہلے صدر کا قرعہ سیف اللہ خالد کے نام پر نکلا۔
سیف اللہ خالد نے میڈیا کو پارٹی کے نظریے سے آگاہ کرتے ہوئے کہا کہ ہم ایک حقیقی اسلامی اور فلاحی ریاست بنانے کے لیے کام کریں گے اور آئندہ انتخابات میں حصہ لینے کے لیے ہم خیال لوگوں سے بھرپور رابطے کریں گے۔
انہوں نے کہا کہ ملک میں متوسط طبقے کے لیے کوئی آواز نہیں اٹھا رہا تاہم ہماری جماعت محروم طبقے کے لیے امید کی کرن بن کر ثابت ہوگی اور ہم اسلامی نظام کی بحالی کے لیے بھی جدوجہد کریں گے۔
