لاہور،اسلام آباد: تحریک انصاف کے چیئرمین عمران خان نے کہا ہے کہ عوام ہفتے کے روز چیف جسٹس اور سپریم کورٹ سے اظہار یکجہتی کرنے کیلئے باہر نکلیں۔
ویڈیو پیغام میں انہوں نے کہا کہ ملک ایک فیصلہ تاریخ کے موڑ پر کھڑا ہے،تاریخی مہنگائی اور بیروزگاری عروج پر ہے، ملک پر مافیا کا قبضہ ہے، حکومت کو الیکشن میں شکست کا خوف ہے،حکومت آئین اور سپریم کورٹ کو تباہ کرنے پر تلی ہوئی ہے،یہ مافیا چیف جسٹس اور ججز کیخلاف پروپیگنڈا کررہا ہے۔
اپنے بیان میں فواد چوہدری نے سپریم کورٹ سے نگران حکومتوں کو فوری طور پر کام سے روکنے کا مطالبہ کردیا ۔ اپنے ایک بیان میں فواد نے کہا کہ اس سلسلے میں ہماری پٹیشن فوری فکس کی جائے، اور انتخابات تک معاملات چلانے کیلئے ایڈ منسٹریٹر مقرر کئے جائیں ۔
ڈاکٹر یاسمین راشد نے عندلیب عباس ، شیخ امتیاز محمود سمیت دیگر لاہور کے ٹکٹ ہولڈر کے ہمراہ پریس کانفرنس سے خطاب کرتے ہوئے کہا کہ دنیا کے مقابلے میں پاکستان کی صحافت میں ظلم ہورہا ہے،ارشد شریف کی ماں اور بیوی انصاف کے دروازے بجارہی ہیں ، حالات دوبارہ خراب ہورہے ہے ،الیکشن کمیشن ن لیگ کے گھر کی باندی بنی بیٹھا ہے جبکہ یاسمین راشد کی صدارت میں الیکشن مہم کی مانیٹرنگ کے حوالے سے لاہور کے ٹکٹ ہولڈر کا اجلاس ہوا جس میں الیکشن مہم کے حوالے سے آئندہ کی حکمت عملی مرتب کی گئی۔
