اسلام آباد: مجلسِ شوریٰ پارلیمنٹ کے مشترکہ اجلاس کاشیڈول ایک بارپھر تبدیل کر دیا گیا۔
مشترکہ اجلاس 4 مئی کو دن 11 بجے کے بجائے 15 مئی 2023 کو سہ پہر 4 بجے پارلیمنٹ ہاؤس میں منعقد ہو گا۔ اسپیکر قومی اسمبلی نے مشترکہ اجلاس کے شیڈول میں تبدیلی پارلیمنٹ کے جوائنٹ سیٹنگز رولز 1973 کے قاعدہ 4 کے تحت تفویض شدہ اختیارات کو بروئے کار لاتے ہوئے کی ہے۔
قومی اسمبلی سیکرٹریٹ کی جانب سے مجلس شوریٰ پارلیمنٹ کے مشترکہ اجلاس کے شیڈول میں تبدیلی کا سرکلر جاری کردیا گیا ہے۔
دوسری جانب صدر مملکت ڈاکٹر عارف علوی نے سینیٹ کا اجلاس 5 مئی جمعہ صبح ساڑھے 10بجے طلب کر لیا۔سینٹ سیکرٹریٹ سے جاری اعلامیہ کے مطابق سینیٹ اجلاس آئین کے آرٹیکل 54 (1) کے تحت طلب کیا گیا ہے ۔
