کراچی: امیر جماعت اسلامی کراچی حافظ نعیم الرحمن نے کہا ہےکہ بلدیاتی انتخابات میں پیپلز پارٹی بدترین دھاندلی کے باوجود اکثریت حاصل نہ کرسکی، پیپلز پارٹی کی فسطائیت کا انتقام جمہوریت سے لیں گے، خرید و فروخت جو بھی کرے گا، وہ منہ پر کالک ملے گا، پی ٹی آئی کے ساتھ مثبت پیشرفت ہوئی ہے، میئر کراچی ہمارا ہوگا۔
حافظ نعیم نے کہاکہ اہل کراچی پیپلز پارٹی کی کراچی دشمنی سے آگاہ ہیں، شہر کو وڈیروں کی اوطاق نہیں بننے دیں گے۔
ان خیالات کا اظہار انہوں نے ادارہ نور حق میں ہنگامی پریس کانفرنس سے خطاب میں کیا۔
انہوں نے کہا کہ گورنر سندھ مردم شماری میں اہل کراچی کی گنتی درست کرانے کا وعدہ وفا نہ کرسکے، آبادی پر پھر سودے بازی کی جارہی ہے ۔
انہوں نے کہاکہ میئر کے انتخاب کا وقت آیا تو اس طرح کی ترامیم کرنا بدنیتی اور من پسند نتائج حاصل کرنے کی کوشش ہے، دیگر پارٹیوں سے بھی رابطے کریں گے۔
انہوں نے کہاکہ پی ٹی آئی کے ساتھ ملکر ہمارے ووٹ 191 ہو جائیں گے، پیپلز پارٹی کو 24 ووٹ دکار ہوں گے، جس کیلئے وہ خرید و فروخت کرے گی۔
