کراچی: الفلاح کے رہائش اور سندھ بلڈنگ کنٹرول اٹھارٹی کے اسسٹنٹ ڈائریکٹر اور ایم کیو ایم پاکستان ملیر ٹاؤن کے لاپتہ عہدیدار کی تشدد زدہ لاش ایدھی سرد خانے سے برآمد ہوئی ہے۔
مقتول اظہر حسین تین جون کی رات سوا نو بجے اپنی رہائش گاہ الفلاح انعم سوسائٹی سے بیٹی کو میٹنگ میں جانے کا بتا کر گیا تھا جس کے بعد لاپتہ ہوگیا۔
اہلخانہ نے ہر جگہ تلاش کے بعد ایدھی سرد خانے جا کر دیکھا تو ان کی لاش رکھی ہوئی تھی ، ایدھی حکام کے مطابق مہتاب نامی شخص نے اظہر کی حسین کی لاش 4 جون کی رات دس بجکر 15 منٹ پر رکھوائی تھی جس نے بتایا کہ وہ میت کو سول اسپتال سے لایا ہے اور وجہ موت طبعی بتائی تھی جبکہ مرنے والا کا نام طاہر اور پتہ اورنگی ٹاؤن سیکٹر 6 سی مکان نمبر 97 بتایا تھا۔
مہتاب نے اپنا موبائل فون نمبر بھی درج کرایا تھا ، اظہر حسین کی تشدد زدہ لاش ملنے کی اطلاع پر اہلخانہ میں کہرام مچ گیا اور مقتول کے اہلخانہ اور دیگر افراد ایدھی سرد خانے سہراب گوٹھ پہنچ گئے جہاں مقتول کے بھائی نے بتایا کہ لاش پر تشدد کے واضح نشانات پائے گئے ہیں اور شبہ ہے کہ ہاتھوں پر میرے بھائی کو سگریٹ سے بھی داغا گیا ہے۔
ان کا کہنا تھا کہ میرے بھائی کو اس حال میں پہنچانے والوں کا بھی کچھ پتہ نہیں پا رہا تاہم واقعہ کی مزید تحقیقات کے لیے ایس ایچ او سمن آباد سلیم خان ایدھی سرد خانے پہنچ گئے اور اہلخانہ سے معلومات حاصل کرنے کے بعد الفلاح پولیس سے رابطہ کر کے انھیں اظہر حسین کی ہلاکت کے حوالے سے آگاہ کر دیا۔
اس حوالے سے پولیس کا کہنا تھا کہ وجہ موت کے تعین کے لیے پوسٹ مارٹم کے لیے لاش الفلاح پولیس کے پہنچنے کے بعد ہی طے کیا جائیگا کہ لاش کو عباسی شہید یا جناح اسپتال منتقل کیا جائے۔
دوسری جانب ایم کیو ایم نے اظہر حسین کی ہلاکت پر سخت ردعمل دینے کا فیصلہ کیا ہے، جس کا باضابطہ اعلان کچھ دیر میں کیا جائے گا۔
